"Hazırlığın gedişindən razı qalmışam. Avqustun 24-dən komanda toplanışdadır. Bakıda da bunu bildirmişdim. Şərait də məni tam qane etdi. Təəssüf ki, iki futbolçumuz - Bədavi və Ruslan zədəli olduqları üçün bizimlə deyillər. Sabahkı oyuna tam hazırıq. İlk oyuna qələbə ilə başlamaq istəyirik. Hədəfimiz Bakıya 3 xalla qayıtmaqdır".

"Report"un San Marinoya ezam olunmuş əməkdaşının məlumatına görə, bunu Azərbaycan millisinin baş məşqçisi Robert Prosineçki deyib.

DÇ-2018-in seçmə mərhələsində səfərdə San-Marino ilə keçiriləcək oyundan danışan xorvatiyalı mütəxəssis bunları bildirib: "Əminəm ki, hamını əsas heyət maraqlandırır. Təəssüf ki, zədəli futbolçularımız var. Hava yaxşıdır və heç çətinlik, psixoloji gərginlik yoxdur. Sabahkı oyunu böyük həvəslə gözləyirik. Məşqdəki performansı göstərsək, heç bir çətinliyimiz olmayacaq. Bu oyuna nikbin baxmalıyıq. Son yoldaşlıq oyunlarından da razı qalmışam. Komandam həm fiziki, həm də psixoloji baxımdan hazırdır. Klublarında əsas heyətə düşməyən futbolçular özlərini yaxşı tərəfdən göstərir. Ramil Şeydayev və Emil Mahmudov da komandaya sağlam rəqabət gətirir".

Baş məşqçi San Marino əhalisini bu gün Respublika Günü münasibəti ilə təbrik edib: "Bayram öz yerində, ancaq sabah biz futbol oynayacağıq. Son günlərdə komandamdan həzz alıram. San Marino futbolçularının öz millətinə hədiyyə verməməsinə çalışacağıq. Bizi yalnız qələbə qane edir. Son oyunlarda qol şanslarından istifadə edə bilməmişik. Bunun da üzərində işləmişik. Rəqibi kifayət qədər təhlil etmişik".

Xorvatiyalı məşqçi rəhbərlik etdiyi komandanın Rusiyada keçiriləcək DÇ-2018-də iştirakının mümkünsüz olmadığını söyləyib: "Artıq ilyarımdır Azərbaycandayam və komandaya hamıdan çox mən inanıram. Ən böyük nikbin insan da mənəm. Ancaq çətin qrupa düşmüşük. Mən komandada olan hər kəsə inanıram və deyirəm ki, niyə də yox? İstərdim ki, hər kəs komandaya inansın və "Niyə də yox?" şüarımızı desin. Biz böyük komandalara qarşı futbol oynamağı bacardığımızı göstərmişik".

O, öz klubunda meydana çıxmayan futbolçuların milliyə dəvət olunmasından da danışıb: "Kamran, Ramil, Emil klublarında oynamır. Siz düşünürsünüz ki, onlar meydana çıxacaq? Ramil və Emil yeni oyunuçlardır. Onları dəvət etmişəm ki, hər şeyi canlı görüm. Mahmudovla bağlı onu deyirəm ki, toplanışda bir müsbət sürpriz varsa, o da Emindir. Onun topla davranışı yüksək səviyyədədir və inanıram ki, qısa zamanda "Boavişta"nın heyətində yer alacaq. Həmin mövqenin oyunçuları rəqabət hiss edəcəklər. Azərbaycanda bu gün ən yaxşı qapıçı Kamrandır. Bilmirəm nəyə görə, Kamran Azərbaycanda klub tapa bilmir? Mən Səlahətlə Anara da böyük hörmət edirəm".

Prosineçki millinin heyətinə cəlb olunacaq Dəniz Yılmazla bağlı danışmaq istəməyib: "Dəniz Yılmazla bağlı məsələyə gəlincə, bu barədə indi danışmaq istəmirəm. Çünki bütün diqqətimizi sabahkı oyuna yönəltmişik. San Marino ilə oyundan sonra Dəniz Yılmazla bağlı danışaram".