İyulun 28-də İsrail hökumətinin rəhbəri Benyamin Netanyahu ABŞ Prezidenti Donald Tramp ilə görüşəcək və Vaşinqtonun İslam Respublikasına qarşı irimiqyaslı hərbi fəaliyyətlərə yenidən başlamaq qərarı verəcəyi halda İran ərazisinə zərbələrlə bağlı yeni planlarını ona təqdim edəcək.

Bu məlumatı öz mənbələrinə əsaslanaraq Amerikanın "Al-Monitor" portalı yayıb.

Portalın məlumatına görə, söhbət İsrail silahlı qüvvələrinin İranın sənaye obyektlərinə, körpülərə və dəmir yolu infrastrukturuna zərbələr üzrə yeni operativ planlarından gedir. Mənbələr vurğulayırlar ki, Netanyahu rəsmi olaraq Amerikanın İrana qarşı apardığı hazırkı hərbi kampaniyada ölkəsinin iştirakını dəstəklədiyini nümayiş etdirməməyə çalışsa da, Vaşinqtonla qeyri-rəsmi danışıqlarda baş nazir bu təşəbbüsü dəstəkləyir.

Portal həmçinin bildirir ki, liderlər arasında baş tutacaq görüşün mühüm hədəflərindən biri Qəzza zolağı, Livan və İran mövzularındakı fikir ayrılıqları səbəbindən sarsılmış şəxsi münasibətlərin yenidən bərpasıdır.

İsrailin N12 telekanalının məlumatına görə, Tramp və Netanyahunun Vaşinqtonda görüşü Bakı vaxtı ilə saat 19:00-a planlaşdırılıb. Bu, Trampın Ağ Evə qayıtmasından bəri səkkizinci görüş olacaq. İyulun 27-də İsraildən ABŞ-yə uçmazdan əvvəl Netanyahu ABŞ lideri ilə planlaşdırılan görüş zamanı gündəlikdəki bütün məsələləri, ilk növbədə İranı müzakirə etmək niyyətində olduğunu bildirib.