Belçikanın xarici işlər naziri Maksim Prevo ABŞ-nin bu ölkədəki səfiri Bill Uaytı nazirliyə çağırıb.

Buna səbəb səfərin Belçikanın səhiyyə nazirini sosial şəbəkələrdə ələ salmasıdır.

Nəşrin məlumatına əsasən, B.Uayt bir müddət əvvəl sosial şəbəkə hesabında səhiyyə naziri Frank Vandenbrukun süni intellekt vasitəsilə yaradıldığı ehtimal edilən şəklini paylaşaraq "Belçikanın əsas uğursuzu kimdir?" qeydini yazıb. Fotoda nazirin portreti siqaret qutusunun üzərində təsvir olunub. Qutunun üzərində "Vandenbruk. Həyatın bütün sevinclərini məhv edir" sözləri əks edilir.

M.Prevo isə buna cavab olaraq bildirib ki, səfir tərəfindən hökumət nümayəndəsinin ünvanına bu cür təhqiredici ifadələrin işlədilməsi qəbuledilməzdir. Belçika Xarici İşlər Nazirliyi diplomatın çağırıldığını təsdiqləyib.

Nəşr xatırladıb ki, mart ayında F.Vandenbruk alkoqol reklamlarında sağlamlığa zərər barədə xəbərdarlıq mətninin dəyişdirilməsini nəzərdə tutan qanun layihəsi təklif edib. Nəşrin qənaətinə görə, ABŞ-li səfirin paylaşımı böyük ehtimalla məhz bu təşəbbüsə yönəlmiş bir istehzadır.