ABŞ-nin İranın nüvə obyektlərinə endirdiyi zərbələr nəticəsində xəsarət alanlar var.

Bunu İran Səhiyyə Nazirliyinin nümayəndəsi Hüseyn Kermanpur "X" sosial şəbəkəsində yazıb.

Xəsarət alanlarda radiasiya şüalanması əlamətlərinin olmadığı qeyd edilir.

"Bir neçə il əvvəl Səhiyyə Nazirliyi nüvə obyektlərinə ən yaxın tibb müəssisələrində fövqəladə nüvə halları üçün mərkəzlər təşkil edib. Xoşbəxtlikdən, ABŞ-nin bombardmanlarından sonra bu mərkəzlərə göndərilən zərərçəkənlərin heç birində radiasiya ilə şüalanma izləri olmayıb", - Kermanpur vurğulayıb.

Bundan başqa, İsrailin İranın şərqindəki Yəzd əyalətinə endirdiyi zərbə nəticəsində İslam İnqilabı Keşikçiləri Korpusunun (SEPAH) 7 hərbçisi həlak olub.

Məlumata görə, SEPAH döyüşçülərindən əlavə, iki çağırışçı da öldürülüb.

18:42

İsrail Hərbi Hava Qüvvələri İranın dörd müxtəlif bölgəsində eyni vaxtda reaktiv yaylım atəşi sistemləri, pilotsuz təyyarələr və hərbi hədəflərə hücum edib.

Bu barədə İsrail Müdafiə Qüvvələri (SAXAL) məlumat yayıb.

"SAXAL eyni vaxtda dörd ərazidə - İsfahan, Buşəhr, Əhvaz və ilk dəfə Yəzd bölgəsində reaktiv yaylım atəşi sistemləri və pilotsuz təyyarələrə hücum edib", - məlumatda deyilir.

Mətbuat xidməti əlavə edib ki, 30 döyüş təyyarəsi 60-dan çox sursatdan istifadə etməklə İran ərazisində onlarla hərbi obyektə hücum edib.