ABŞ Konqresinin Aşağı Palatası Ukraynanın Rusiya ilə müharibədə qələbəsinin şərtləri ilə bağlı ikihissəli qətnamə layihəsini rəsmi olaraq təqdim edib.

Bu barədə Ukraynanın ABŞ-dəki səfiri Oksana Markarova özünün “Facebook” hesabında məlumat verib.

Qətnamə layihəsində ABŞ Konqresinin Nümayəndələr Palatası Vaşinqtonun siyasətinin Ukraynaya qalib gəlməyə və beynəlxalq səviyyədə tanınmış 1991-ci il sərhədlərinin bərpasına yönəldiyini təsdiqləyir. Sənəddə həm də qələbədən sonra Ukraynanın NATO və digər Avroatlantik qurumlara inteqrasiya yolunun təmin edilməli olduğu göstərilir.

Qətnamə layihəsinə görə, ABŞ müttəfiqləri və tərəfdaşları ilə birlikdə Rusiyanın Ukraynaya təzminat ödəməsini, Ukraynanın bərpasında dünya birliyinin yardımını, Rusiya Federasiyasının rəhbərliyinin işğalçılıq müharibəsinə görə məsuliyyətə cəlb edilməsini, Rusiya Federasiyasının işğal zamanı törətdiyi cinayətlərin qurbanları üçün ədalətin bərpasını təmin etməlidir.