Cəhənnəmə qovuşan İran Yaxın Şərq qonşularından üzr istəyib, təslim olub və artıq onlara atəş açmayacağına söz verib. Bu vəd yalnız ABŞ və İsrailin amansız hücumu səbəbindən verilib.

Bunu ABŞ Prezidenti Donald Tramp "Truth Social"da bildirib.

“Onlar (İran hakimiyyəti – red) Yaxın Şərqi ələ keçirmək və idarə etmək istəyirdilər.

Bu, İranın min illər ərzində ilk dəfədir ki, ətraf Yaxın Şərq ölkələrinə məğlub olmasıdır. İran artıq "Yaxın Şərqin qalibi" deyil, əksinə, "Yaxın Şərqin məğlubudur”. Təslim olana və ya daha çox ehtimal ki, tamamilə dağılana qədər onilliklər boyu belə qalacaq!” - o qeyd edib.

Tramp eyni zamanda yazıb ki, bu gün İrana çox ağır zərbə vurulacaq:

“Bu gün İran çox güclü zərbə alacaq! İranın davranışına görə indiyədək hədəf kimi nəzərdən keçirilməyən ərazilər və əhali qruplarının tam məhv edilməsi məsələsi ciddi şəkildə müzakirə olunur”.

Xatırladaq ki, İran Prezidenti Məsud Pezeşkian Müvəqqəti Rəhbərlik Şurasında martın 7-də İranın hücum etdiyi qonşu ölkələrdən üzr istədiyini deyib. İran prezidenti qeyd edib ki, Müvəqqəti Rəhbərlik Şurası qonşu ölkələrə hücum etməmək və həmin ölkələrdən İrana hücum olmasa, raket atmamaq barədə qərar qəbul edib.