Rusiya Prezidenti Vladimir Putin Səudiyyə Ərəbistanının Ər-Riyad şəhərində keçirilən Rusiya-ABŞ danışıqları haqqında məlumat alıb və onların nəticələrini yüksək qiymətləndirib.

Bunu Rusiya lideri Sankt-Peterburqdakı pilotsuz uçuş aparatları istehsalı zavodu ziyarəti zamanı jurnalistlərin suallarına cavab verərək bildirib.

"Mənə məlumat verildi, danışıqları yüksək qiymətləndirirəm, nəticə var", - deyə Putin qeyd edib.

Bundan əlavə, Rusiya prezidenti bildirib ki, ABŞ lideri Donald Trumpla görüşməkdən məmnunluq duyacaq və onun tərəfindən də qarşılıqlı maraq hiss edir. Lakin bu görüş, o cümlədən Ukrayna münaqişəsinin həlli də daxil olmaqla, bir sıra mühüm məsələlərlə bağlı diqqətlə hazırlanmalıdır.

"Mən Donaldla görüşməkdən məmnunluq duyaram, biz çoxdan görüşmürük... Məncə, o da eyni hissi yaşayır. Bu, bizim telefon danışığımızın xarakterindən də görünürdü", - deyə Rusiya lideri vurğulayıb.

"Amma biz elə bir vəziyyətdəyik ki, sadəcə çay və ya qəhvə içmək, oturub gələcək haqqında danışmaq üçün görüşmək kifayət deyil. Komandalarımızın ABŞ və Rusiya üçün son dərəcə vacib olan, o cümlədən Ukrayna istiqamətindəki məsələləri hazırlaması və hər iki tərəf üçün məqbul həllər tapması lazımdır", - deyə Putin qeyd edib.