Prezident İlham Əliyevin tapşırığına və bölgələr üzrə vətəndaş qəbulu cədvəlinə uyğun olaraq daxili işlər naziri, general-polkovnik Vilayət Eyvazov mayın 6-7-də İmişli rayonunda növbəti vətəndaş qəbulu keçirib.

DİN-in mətbuat xidmətindən bildirilib ki, nazir əvvəlcə İmişli rayonunda Ümummilli Lider Heydər Əliyevin abidəsini ziyarət edərək xatirəsini ehtiramla yad edib.

Daha sonra polis şöbəsinin inzibati binasında İmişli, Füzuli, Beyləqan, Xocavənd, Saatlı, Sabirabad və Kürdəmir rayonlarından, eləcə də digər bölgələrdən qəbula gələn 264 vətəndaşın müxtəlif məsələlərlə bağlı müraciətləri dinlənilib.

Vətəndaş müraciətlərinin operativ və qanunvericiliyin tələblərinə uyğun həlli, həmçinin vətəndaş məmnunluğunun təmin olunması məqsədilə aidiyyəti qurum rəhbərlərinə müvafiq tapşırıqlar verilib. Müraciətlərin böyük hissəsi yerindəcə həll olunub, digər məsələlər isə nəzarətə götürülüb.

Səfər çərçivəsində general-polkovnik Vilayət Eyvazov polis və daxili qoşunlarda xidmət etmək istəyən gənclərin sıra baxışını da keçirib. Yoxlama zamanı xidmətə qəbul şərtlərinə uyğun gələn 216 nəfər növbəti mərhələyə buraxılıb.


Vilayət Eyvazov İmişlidə vətəndaş qəbulu və sıra baxışı keçirib
Vilayət Eyvazov İmişlidə vətəndaş qəbulu və sıra baxışı keçirib