Britaniya kral sarayı şahzadə Harri və həyat yoldaşı Meqan Marklın amerikalı teleaparıcı Opra Uinfriyə müsahibəsi zamanı səsləndirdikləri fikirlərə münasibət bildirib.

TASS xəbər verir ki, kral dəftərxanasından yayılan bəyanatda irqçilik ittihamlarının ciddi məsələ olduğu və bunun araşdırılacağı bildirilib.

“Bütün ailə təəssüf hissi ilə öyrəndi ki, son illər Harri və Meqan üçün heç də asan olmayıb. Qaldırılan məsələlər, xüsusən də irqçilik məsələsi ciddi narahatlıq doğurur. Bəzən xatirələr fərqli ola bilər. Lakin istənilən halda, məsələ ailə daxilində fərdi şəkildə araşdırılacaq. Harri, Meqan və onların oğlu Arçi hər zaman ailənin sevilən üzvləri olaraq qalacaqlar”, - deyə bəyanatda qeyd edilib.

Qeyd edək ki, sözügedən müsahibə iki gün öncə yayımlanıb və Britaniya kral ailəsi yalnız indi məsələyə rəsmi münasibət bildirib.