Türkiyədə Təhsil Alan Məzunların Diplomlarının Tanınmaması ilə Bağlı Prezidentə Müraciəti

Türkiyə Respublikasında bakalavr təhsili almış bir qrup Azərbaycanlı məzun, diplomlarının tanınmaması ilə bağlı üzləşdikləri problemin həll edilməsi məqsədilə Azərbaycan Respublikasının Prezidenti cənab İlham Əliyevə kütləvi müraciət ünvanlayıblar.

Məzunların müraciətində bildirilir ki, “Azərbaycan Respublikasının Təhsil Nazirliyi tərəfindən Türkiyədə açıqöyrətim şəklində təhsil almış tələbələrin diplomlarının tanınmasından imtina edilib. Buna baxmayaraq, bu vaxta qədər Ali Məhkəmə tərəfindən tələbələrin hüquqları bərpa olunurdu və diplomları tanınırdı. Lakin son dövrlərdə Təhsil Nazirliyinin məhkəmələrə yanlış məlumatlar verərək təsir göstərməsi nəticəsində məhkəmələrin mövqeyi dəyişmiş və diplomların tanınmamasına dair məhkəmə qərarları verilməyə başlamışdır. Bu vəziyyət, məzunların həm şəxsi, həm də peşəkar həyatına mənfi təsir göstərməkdədir və onların Konstitusion hüququları təhsil nazirliyi tərəfindən kobud surətdə tapdalanır Məzunlar, diplomlarının tanınmaması səbəbindən ölkə daxilində magistratura səviyyəsində təhsil ala bilmir və iş tapmaqda çətinlik çəkirlər. Bu isə ölkənin potensial kadrlarının gələcəklərinin məhv olmasına səbəb olur”. İki qardaş ölkənin bütün sahələrdə əlaqələri yüksək inkişaf etdiyi dövrdə Ölkə prezidentlərinin daha da sıx əlaqə qurması və ölkələr arasında təhsil sisteminin qarşılıqlı inteqrasiya etdirilməsi məqsədilə Türkiyə-Azərbaycan universitetini yaratdığı bir dövrdə, Təhsil Nazirliyinin qardaş ölkənin diplomunun tanımaması iki ölkələrimiz arasında olan dostluq və qardaşlıq münasibətlərinə ciddi xələl gətirir.