Qətər HƏMAS və İsrail arasında təcili şəkildə əsir mübadiləsinə vasitəçilik etmək niyyətindədir.

Bu barədə Çinin “Sinxua” xəbər agentliyi HƏMAS-dakı mənbəyə istinadən məlumat verib.

“ABŞ-nin dəstəyi ilə Qətər İsrail həbsxanalarında olan fələstinli qadın məhbusların müqabilində HƏMAS tərəfindən əsir götürülən israilli qadınların azad edilməsi ilə bağlı təcili razılaşma əldə etməyə çalışır”, - deyə adının açıqlanmasını istəməyən mənbə bildirib.

Mənbə qeyd edib ki, HƏMAS İsrail həbsxanalarında saxlanılan 36 fələstinli qadın məhbusun hamısının azad olunacağı təqdirdə məhbus mübadiləsinə razılıq verəcəyi barədə Qətəri məlumatlandırıb.

Xatırladaq ki, HƏMAS 7 oktyabr tarixində Qəzza zolağına bitişik İsrail şəhərlərinə qəfil hücumlar həyata keçirib ki, bu da İsraili Qəzza zolağına cavab zərbələri endirməyə vadar edib.

Hücum zamanı HƏMAS döyüşçüləri Qəzza zolağı ilə İsraili ayıran təhlükəsizlik səddini aşaraq yaxınlıqdakı yaşayış məntəqələrinə basqın edib, israilliləri, o cümlədən də qadınları öldürüb və əsir götürüblər.