Bir neçə gün öncə cəbhə bölgəsində yerləşən hərbi hissələrin birində olan müdafiə naziri, general-polkovnik Zakir Həsənov əsgərlərlə birlikdə yemək masasına oturdu. Şəxsi heyətlə birlikdə nahar edən nazirin əlindəki çörəyi bölərək üzbəüz əyləşmiş əsgərə uzatması ilə bağlı kadr “interxeber.az” saytının diqqətindən yayınmadı. Bu barədə paylaşdığımız videoçarx da oxucularda böyük marağa səbəb oldu. Elə bu səbəbdən də “Bizim Yol” Facebook səhifəsində həmin kadrdan çıxarılmış fotonu paylaşaraq, “Zakir Həsənov haqqında nə düşünürsünüz?” sualı ilə izləyicilərimizə müraciət etdik.
Bir neçə gün ərzində həmin fotonu minlərlə istifadəçi bəyənib və çox sayda paylaşma olub. Həmçinin suala cavab olaraq, yüzlərlə rəy yazılıb. Rəylərin demək olar ki, hamısında Zakir Həsənov müsbət qiymətləndirilib. İstifadəçilər tərəfindən ən çox bəyənilən rəy isə “ Xeyrini gördüyümüz yeganə nazir” şərhi olub.
Ən çox bəyənilən şərhlərdən bir neçəsini təqdim edirik:

- Gəlişi ilə orduya, həm də sıravi vətəndaşlara təkan verdi. 5 il bundan qabaqkı əsgərlə indiki əsgərdə çox fərq var, xüsusilə də cəbhə zonalarında.
- Zakir Həsənov bütün məmurların gözüdür!
- Türklər demiş, adam kimi adam!
- Əsl Azərbaycan kişisi, xalqını əsgərini düşünən səmimi bir komandir
- Bir sözlə halal olsun. Bəyənməyənlər baxsin ibrət alsın
- Zakir Həsənov müdafiə naziri olandan sübüt etdi ki, Azərbaycan ordusu erməniləri darmadağın etməyə qadirdi.

Bəziləri isə Zakir Həsənovdan daha çox şey gözlədiklərini yazıblar:

- Xalq ondan ŞUŞAnı gözləyir. Şuşanı bu millətə qaytara biləcəksə, onda həqiqi qəhrəman ola bilər və Azərbaycanın tarixinə qızıl hərflərlə yazdırar adını.
- O yaxşı nazir ola bilər. Amma Qarabaği qaytarmaq məsələsi bir az çətin məsələdir. Elə şüylər var ki, onun iradəsindən asılı deyil.
- Mən nzairə məktub yazmaqdan yoruldum. Peşkaları məktubumu cırmaqdan yorulmadılar.
- İdarə eləyər, amma əsgərlərin qidalanmasına diqqət eləsin. Onlar yaxşı qidalanmalıdır ki, gücləri olsun. İkincisi də elə “çast”lar var ki, sanitar qaydalar pisdir.

“Bizim Yol” qəzeti və bizimyol.info saytı olaraq, General-polkovnik Zakir Həsənova bundan sonrakı fəaliyyəti dövründə də xalqın sevgisini qazanmağı, xalqda və əsgərlərdə döyüş ruhunun yüksəldilməsi istiqamətində gördüyü işləri genişləndirməyi və hər zaman “Güvənilən komandir” obrazında qalmasını arzu edirik.