ABŞ Senatı Rusiya Federasiyası prezidentini hərbi cinayətkar kimi pisləyən qətnamə qəbul edib. Qətnamə hər iki partiyanın senatorları tərəfindən dəstəklənib, "Röyters" agentliyi xəbər verib.

Senat Putinin rəhbərliyi aitında Rusiya silahlı qüvvələri tərəfindən "insanlığa qarşı zorakılıq və hərbi cinayətləri qətiyyətlə pisləyib".

Respublikaçı senator Lindsi Qrem tərəfindən tədqim olunan qətnamədə Haaqadakı Beynəlxalq məhkəməyə və digər ölkələrə Rusiya Federasiyasının Ukraynaya hərbi müdaxiləsi zamanı Putin rejiminin törətdiyi hərbi cinayətləri diqqətlə araşdırmağa çağırış edilib.

"Bu cinayətkar əməllər hərbi cinayətlərin diqqətlə araşdırılmasını tələb edir. Biz hamımız, demokratlar və respublikaçılar, bu zalda birləşərək bəyan edirik ki, Vladimir Putin Ukrayna xalqına qarşı törətdiyi vəhşiliklərə görə məsuliyyətdən yaxa qurtara bilməz", - Senatda demokratik çoxluğun lideri Çak Şumer bəyan edib.

Senatın qərarı partiyaların Co Bayden administrasiyasının Putinin təcavüzünə qarşı sərt mövqeyini dəstəklədiklərini nümayiş etdirib.

Xatırladaq ki, Haaqadakı Beynəlxalq məhkəmənin prokuroru Kərim Xan Ukraynadakı vəziyyətin rəsmi araşdırılması barədə qərar qəbul edib.

Son günlərin hadisələri sübut edir ki, Ukrayna ərazisində Haaqa məhkəməsinin yurisdiksiyasına düşən cinayətlər törədilməkdə davam edir.