Ukraynalı jurnalist, “Qordon” internet-nəşrinin təsisçisi Dmitri Qordon Ukraynanın Baş prokurorunun azərbaycan əsilli müavini Gündüz Məmmədovun vəzifədən uzaqlaşdırılmasını tənqid edib.

Bu barədə jurnalist “Ukrayna 24” telekanalının efirində çıxışı zamanı bildirib.

O, bu qərarın yanlış olduğunu qeyd edib.

“Gündüz Məmmədov tamamilə korrupsiyadan uzaq adamdır. O, peşəkarlardan ibarət komanda toplayıb, böyüdüb. Bu insanlar Rusiyanın 7,5 il illik aqresiyası zamanı olan bütün cinayətləri qeydə alıblar. Orada elə materiallar toplanıb ki... Mən bu barədə çox danışa bilmərəm. Ancaq bu “müharibə departamentində” bir neçə Nürnberq və ya Haaqa prosesi üzərində çalışılıb”, - deyə o bildirib.

Dmitri Qordon həmçinin Gündüz Məmmədovun yerinə baş prokurorun digər müavini Maksim Yakubovskinin təyin olunmasına qəzəblənib. Onun sözlərinə görə, Yakubovskinin Rusiya Prezidentinin qızının xaç atası olan millət vəkili Viktor Medvedçukun adamı olduğu deyilir.

“Məmmədov vurulan “Boeing” təyyarəsi ilə bağlı (2014-cü ildə Donetsk vilayətində) Ukraynanın bütün mövqeyini qoruyur. O, həmçinin düşmənin arxa cəbhəsində aparılan çoxsaylı gizli, ciddi xüsusi əməliyyatları kurasiya edir”, - deyə D.Qordon bildirib.

Jurnalist həmçinin bildirib ki, Gündüz Məmmədov mütləq öz vəzifəsinin başına qaytarılmalıdır:

“Çox qətiyyətlə deyirəm ki, Gündüz Məmmədov yerinə qaytarılmalıdır”.

Qeyd edək ki, Gündüz Məmmədov 1974-cü ildə Gəncədə anadan olub.