Macarıstan Prezidenti Ader Yanoş və Baş nazir Viktor Orbanın sərəncamı ilə Azərbaycan Dövlət Akademik Opera və Balet Teatrının baş dirijoru və musiqi rəhbəri, Azərbaycanın Əməkdar artisti, Prezident mükafatçısı, beynəlxalq müsabiqələr laureatı Əyyub Quliyev Macarıstanın ən yüksək dövlət mükafatı - “Qızıl Xaç” ordeni ilə təltif olunub.

Sərəncam Macarıstan müstəqillik günü ərəfəsində - 21 oktyabrda imzalanıb. Təltif olunanlar sırasında Macarıstan və eyni zamanda, dünyanın bir çox ölkələrindən görkəmli elm və mədəniyyət xadimləri, incəsənət sahəsində çalışan tanınmış yazıçılar, musiqiçilər və rəssamlar da var.

Dirijor Əyyub Quliyev bu mükafata mədəniyyət sahəsində əldə etdiyi uğurlar və Azərbaycanla Macarıstan arasında əlaqələrin inkişafında verdiyi xüsusi xidmətlərinə görə layiq görülüb.

Ordenin təqdimat mərasiminin Macarıstanın Azərbaycandakı səfirliyində keçirilməsi planlaşdırılır.