"Real Madrid" klubunun ulduz futbolçusu Luka Modriç əfsanəvi futbolçu Ferens Puşkaşın rekordunu yeniləyib.

Xorvatiyalı yarımmüdafiəçi Madrid klubunda qol vuran ən yaşlı futbolçu olub.

O, La Liqanın XII turundan təxirə salınan matçında "Valensiya"nın (2:1) qapısına yol tapıb. Luka 39 yaş 116 günlüyündə fərqlənib. O, 1966-cı ildə 39 yaş 15 günlüyündə "Real"da qol vuran əfsanəvi Ferens Puşkaşın rekordunu qırıb.

Bu matç Lukanın "Real"da 561-ci oyunu olub. O, bununla da klub tarixində ən çox oynayan 10 futbolçusu sırasına qoşulub.

Qeyd edək ki, "Valensiya" ilə matçın 80-ci dəqiqəsində meydana çıxan Luka beş dəqiqə sonra qol sevinci yaşayıb.