Alimlər 8 yeni planet kəşf ediblər. ABŞ-ın Milli Kosmik Agentliyi (NASA) tədqiqatçılarının tapdığı bu 8 planet günəşdən daha kiçik və daha az istilik verən bir ulduzun ətrafında fırlanırlar. Tədqiqatçıların sözlərinə görə, bu planetlər Goldilocks Qurşağında yer alıblar. Qeyd edək ki, “Goldilocks Qurşağı” termini kosmosda, suyun maye olaraq qala bildiyi bölgəyə verilən addır. Bu planetlərdən Yer kürəsinə ən çox bənzəyəni isə Kepler adı verilən planetdir.

ABŞ-ın Amerika Milli Kosmik Agentliyinin (NASA) nəzdində olan Kepler teleskopundan edilən müşahidə nəticəsində bəlli olub ki, kəşf edilən planetlərin, Yer kürəsinə olan uzaqlığı 470 işıq ilinə bərabərdir. Harvard Universiteti Astrofizik Mərkəzinin araşdırmacısı Guillermo Torres qeyd edib ki, bu 8 planetin səthi, böyük ehtimalla, eynilə dünyada olduğu kimi, qayalarla əhatə olunub. Kiçik planetlərin səthinin qayalıq olma ehtimalının daha yüksək olduğunu söyləyən Torres, Kepler planetinin Yer kürəsinə daha çox bənzədiyini vurğulayıb. Tədqiqatçılar həmçinin qeyd ediblər ki, önümüzdəki illərdə daha mükəmməl teleskopların icad edilməsi ilə bu planetlər haqqında daha geniş məlumat əldə etmək mümkün olacaq.